sam sameth

Posted on: April 23, 2016
Viewed: 1192

Chham Chhany's post.

hrs ·

ពួកដង្កូវសាសនា

--------------

មេគណខេត្តឡើងច្រៀងមិនត្រូវចាប់ផ្សឹកទេ

Fri, 22 April 2016 នៀម ឆេង PPP

កំពង់ស្ពឺៈ មេគណខេត្តកំពង់ស្ពឺ និងជាចៅអធិការវត្តរលាំងកំពូលដែលបានឡើងច្រៀងជាច្រើនបទនៅលើឆាកតន្ត្រីហើយត្រូវបានគេថតបង្ហោះតាមបណ្តាញសង្គមហ្វេសប៊ុកត្រូវបានគណៈគ្រប់គ្រងសង្ឃដកចេញពីតំណែងជាមេគណខេត្តកាលពីយប់ថ្ងៃពុធប៉ុន្តែមិនបានចាប់ផ្សឹកទេ។

ការមិនចាប់ផ្សឹកនេះធ្វើឲ្យមានការចោទប្រកាន់ថាដោយសារតែសង្ឃអង្គនេះគឺជាអ្នកគាំទ្រគណបក្សកាន់អំណាច។

អ្នកនាំពាក្យក្រសួងធម្មការ និងសាសនាលោក សុះ មុះសិន បានថ្លែងថា៖ «យើងបានដោះស្រាយយប់មិញ (យប់ថ្ងៃពុធ) ហើយថាឲ្យលោកមេគណ ឌូ វណ្ណឌឿន ហ្នឹងលាលែងទៅ»។

លោកបន្តថាព្រះសង្ឃ ឌូ វណ្ណឌឿន បាននិមន្តមកជួបព្រសង្ឃរាជ នន្ទ ង៉ែត ហើយបានសារភាពអំពីកំហុសរបស់លោក។ លោក មុះសិន ក៏បានបញ្ជាក់ដែរថាកំហុសរបស់ព្រះអង្គក្នុងព្រះពុទ្ធសាសនាមិនជាធ្ងន់ធ្ងរប៉ុន្មានទេប៉ុន្តែក្នុងនាមជាថ្នាក់ដឹកនាំសង្ឃកំពូលគឺជាមេគណប្រចាំខេត្តកំពង់ស្ពឺលោកបានធ្វើឲ្យប៉ះពាល់ដល់កិត្តិយសព្រះពុទ្ធសាសនា។

ទាក់ទងតាមទូរស័ព្ទកាលពីម្សិលមិញព្រះសង្ឃ វណ្ណឌឿន មានសង្ឃដីកាថាព្រះអង្គមិនទាន់ដឹងច្បាស់ពីចំណាត់ការរបស់គណគ្រប់គ្រងព្រះសង្ឃយ៉ាងណាទៅលើព្រះអង្គនៅឡើយទេ។

ព្រះអង្គថា៖ «អាត្មាមកភ្នំពេញមកថ្វាយបង្គំស្តេចអាត្មាមកសុំទោសលោក។ មកសុំទោសហ្នឹងព្រោះយើងមិនបានទៅច្រៀងក្នុងក្លិប ក្នុងបារ៍អីឯណាទេ។ យើងធ្វើហ្នឹងមិនមានចេតនាអីទេហើយអាត្មាខុសនោះវាខុសហើយ»។

ព្រះអង្គបានលើកឡើងអំពីមូលហេតុដែលឈានដល់ការច្រៀងលើឆាកនោះថា៖ «នៅថ្ងៃចូលឆ្នាំចុងក្រោយថ្ងៃទី ១៧ ហ្នឹងទាំងគណៈកម្មការទាំងអស់គ្នាហ្នឹងសម្រេចគ្នាថាយកអ័រកាដង់មួយ យប់ទៅហើយយើងក៏យកតាំងពីព្រឹក។ ដល់ពេលយប់ម៉ោង ៧ ភ្លេងចាប់ផ្តើមលេងរហូតដល់ម៉ោង ៩។ ដល់អ៊ីចឹងវាអត់មានអ្នកលេង អត់អ្នករាំអាត្មាក៏ឲ្យលោកយកភេសជ្ជៈប្រាំកេសទឹកសុទ្ធប្រាំកេស ទៅជូនអ្នកមកលេងទាំងអស់ហើយអាត្មាក៏ទៅដែរ។ ដល់ពេលទៅដល់លើវេទិកា ញាតិញោមស្នើថានៅលើវេទិកាមានចេះស្នូតបទអីទេ? អាត្មាក៏ចេញបទនគររាជមួយ និងបទពង្សាវតារខ្មែរមួយ។ ពេលសូត្រហ្នឹងក៏មានអ្នករាំដែរ។ ដល់ពេលចប់ទៅអាត្មាចង់ចុះមកក្រោមតាម្នាក់គាត់ថា យឺ! កុំអាល។ មានចេះបទអីខ្លះទៀតអត់? អាត្មាចេះពីពេលឃ្វាលគោហ្នឹងមិនច្បាស់ទេមានបទគន់មើលក្នុងសួនហ្នឹងមួយហើយក៏ដាក់អាហ្នឹងមួយទៅ។ ដូចសម្ដេចឪលោកច្រៀងអ៊ីចឹងណា!»។

ព្រះតេជគុណបន្តថាក្នុងព្រះពុទ្ធសាសនាការធ្វើបែបនេះត្រូវអាបត្តិបាចិត្តិយៈដែលជាអាបត្តិតិចតួចស្រាលមួយហើយអាចទទួលការប្រៀនប្រដៅកែប្រែពីថ្នាក់លើ។ ព្រះតេជគុណ ឌូ វណ្ណឌឿន បានធ្វើជាមេគណខេត្តកំពង់ស្ពឺបានជាងមួយឆ្នាំក្រោយពេលមេគណមុនបានសុគតទៅ។

លោក សុះ មុះសិន ថ្លែងថាទោះបីជាព្រះសង្ឃអង្គនេះត្រូវបានដកចេញពីតំណែងមេគណខេត្តកំពង់ស្ពឺក៏ដោយ ក៏ព្រះសង្ឃអង្គនេះនឹងនៅតែបន្តធ្វើជាចៅអធិការវត្តរលាំងកំពូលដដែលរហូតដល់មានដំណោះស្រាយនៅក្នុងដំណាក់កាលបន្ទាប់ដែលធ្វើឡើងដោយគណៈគ្រប់គ្រងព្រះសង្ឃ។

ក៏ប៉ុន្តែលោក ម៉ី ចាន់ថន មេឃុំត្រពាំងគង ស្រុកសំរោងទងដែលជាអាជ្ញាធរដែនដីនៃវត្តរលាំងកំពូលនេះថ្លែងថាពលរដ្ឋក្នុងមូលដ្ឋានរបស់លោកប្រហែលជាមិនស្វាគមន៍បន្តឲ្យព្រះសង្ឃ ឌូ វណ្ណឌឿន ធ្វើជាចៅអធិការ និងគង់នៅវត្តនេះទៀតទេ។

លោកបាននិយាយថា៖ «ព្រោះស្តាប់មតិទៅគេខឹងសម្បាណាស់គេថាបានថ្កុំថ្កើងគឺដោយសារពលរដ្ឋ។ តែបើពលរដ្ឋមិនចូលរួមហើយចប់ហើយ»។

ក្នុងប៉ុន្មានថ្ងៃចុងក្រោយនេះមានវីដេអូឃ្លីបមួយត្រូវបានបង្ហោះនៅក្នុងបណ្តាញសង្គមហ្វេសប៊ុកដែលវីដេអូនោះបង្ហាញឲ្យឃើញព្រះសង្ឃ ឌូ វណ្ណ ឌឿន ឡើងច្រៀងនៅលើឆាកតន្ត្រីអមដោយភ្លេង និងមានអ្នករាំចាស់ៗមួយចំនួននៅខាងមុខ។ ក្នុងវីដេអូឃ្លីបនោះ សង្ឃ ឌូ វណ្ណឌឿន ក៏បានហាមអ្នកទស្សនាថា៖ «ណែ! និយាយឲ្យហើយ ណា! អត់មានថតបង្ហោះហ្វេសប៊ុកទេប្រាប់ឲ្យហើយ»។

ប្រធានបណ្តាញព្រះសង្ឃឯករាជ្យព្រះតេជគុណ ប៊ុត ប៊ុនតិញ បានចាត់ទុកការឡើងច្រៀងលើឆាកតន្ត្រីរបស់ព្រះតេជគុណ ឌូ វណ្ណឌឿន ថាជារឿងស្មោកគ្រោកដែលគួរតែចាប់ផ្សឹក ឬយ៉ាងហោចណាស់ត្រូវដកតួនាទីឲ្យអស់ដោយទុកត្រឹមតែជាសង្ឃធម្មតា។

ព្រះតេជគុណបន្តថា ការមិនចាប់ផ្សឹកព្រះសង្ឃដែលគាំទ្រគណបក្សប្រជាជនប្រព្រឹត្តអំពើស្មោកគ្រោកអង្គនេះគឺបង្ហាញឲ្យឃើញថាជាការអនុវត្តស្តង់ដារច្បាប់ពីរខណៈដែលសកម្មជនព្រះសង្ឃផ្សេងទៀតដែលគ្រាន់តែធ្វើសកម្មភាពជួយការពារធនធានធម្មជាតិតវ៉ាប្រឆាំងនឹងអំពើអយុត្តិធម៌ក្នុងសង្គមដែលមិនបានប្រព្រឹត្តកំហុសអ្វីផងនោះក៏ត្រូវបានអាជ្ញាធរតាមធ្វើបាប។

ព្រះតេជគុណ ប៊ុនតិញ មានសង្ឃដីកាថា៖ «ក្នុងសាសនាក៏ស្តង់ដារ ២ ការគ្រប់គ្រងរដ្ឋក៏ស្តង់ដារ ២។ ដូច្នេះដកតួនាទីជាមេគណខេត្តជាមួយទង្វើស្មោកគ្រោកនេះមិនស័ក្តិសមទេព្រោះលោកនៅតែជាចៅអធិការវត្តដដែល»។ «លោកសង្ឃអង្គនោះជាអ្នកគាំទ្រគណបក្សប្រជាជនមុតមាំ ដូច្នេះព្រះសង្ឃអង្គណាដែលមាននិន្នាការស្រឡាញ់គណបក្សប្រជាជនជាពិសេសអ្នកដឹកនាំប្រទេសរាល់ថ្ងៃនេះទោះជាមានកំហុសធំៗក៏គេមានឱកាសដឹកនាំនៅជាអ្នកបួសបានក៏ប៉ុន្តែចំពោះអ្នកធ្វើការការពារធនធានធម្មជាតិទាមទារយុត្តិធម៌ កសាងសន្តិភាព កុំថាឡើយប្រព្រឹត្តកំហុសសូម្បីតែយើងនិមន្តធម្មតាក៏គេធ្វើបាបយើងយកកាំភ្លើងមកយាយីមិនឈប់ឈរដែរ»៕ — in Kampong Speu Province.